الكل يعرف الخثرة وهي اكلة كويتيه لذيذه وشغلها بسيط وما ياخذ وقت الصورة بحطها لكم حتى اقول لكم مقادير هالطبق شنو
http://www.9o9i.com/download/356448d043e5daa16.jpgبسم الله نبدي ،،،،،،،،،
المقادير :
--نص كاس رز تنقعينه من الليل ولي صار باجر تدقينه وتفتتينه بس مو تمرسينه مراس
-- ا زبيدي مغسول ومنظف بالثوم والزنجبيل والليمون وبعدها يجفف من الماء وتضعين عليه بهار سمك خاص وملح ويقطع ثلاث قطع
-- 2 ليمون سحاري
-- 5 فصوص ثوم عدل
-- 2 علب فلفل حار
-- بصله مفرومه للحمس وبصله عدله قصينها نصين للمرقه
-- ملعقة كبيرة صبار ذبيها في ماء حار وصفيها
-- عدد 5 طماطم وسط مبشور + ملعقة وسط معجون طماط
-- شدة كزبرة مفرومه
الطريقه :
يقلى السمك بالزيت ليحمر - يزاح الزيت من مقلاة القلي ويضاف جزأ منه في القدر
يوضع البصل المفروم فوق الزيت ثم يوضع الثوم وبهار السمك واللومي والفلفل العلوب والبصله الكبيرة وتحمسينه عدل .
يضاف الطماط المبشور وفوقه المعجون لين خثر شوي حطيله ماي حار وخليه يغلي وبعدين ضيفي الصبار وحطي العيش المدقوق .
تبدي المرقه تطبخ على نار هادية وحطي الحديده حتى العيش ما يلصق بالجدر حركي على كيفك تلقين الماي يصير خاثر خليها شوي خفيفة مو ثقيله وحطي كزبرة مفرومه شوي والباقي عند التقديم .
الحين يوم تطمنتي على العيش استوى والمرقه شاده عمرها لاهي صاكه ولا هي مويه .
حطيها في ماعون التقديم الفخار وسقطي فوقه الزبيدي ودخلي الصينية الفرن لمدة نص ساعه لين المرقه تاخذ ريحة السمك وتستوي وتمخمخ راسها الزبيديه .
انا احب اسنع شغلي جذي الخثرة نجابها عباله من الجدر وبعدين تلقين السمك يتفتت احب اشوفه على عداله .
لا تنسون تحطون الملح وهذا شكلها بالصورة اخر شي قبل التقديم رشيت باقي الكزبرة .
وما اعتقد في اسهل من هالطريقه ياحلوين
وانشالله عجبكم
الأربعاء سبتمبر 17, 2008 6:07 am