.......... يـــــــا يبـــــــــــــــــه .............

ضاميه ملت يباس الوقت واسباب الشكاوي
مابقالي غير وقتن ممتلي طيب وحبابه

قلبن اصغر من هموم الدرب وحصون البلاوي
قلبن اضعف من هطول الدمع في ليل الكآبه

كان طفلن يشعل برود المواجع بالدعاوي
وكنت له صدرن يلم دموع ليله واضطرابه

قال:آآه،،وصاحت جروحي على صوت الشكاوي
آهته،،عيناه،،قلبه،،والمكان اللي بكى به

سكة الحرمان،،رجف شفاة،،جمرات الخطاوي
نظرته ذيك البريئه من بدا يذبل شبابه

العمر هذا بدون احساس قلبه،،وش يساوي؟؟
ياعسى الله،،ياعسى الله،،مايلحقني غيابه

طفلن ان لاحت بوارق للغلا جاني حياوي
وان نهره الوقت،،عود خطوته تدمي ترابه

ذاق يتم الوقت وتجرع مرارات العداوي
جرح ابكم مالقى له لامغيث ولاقرابه

يــايــبــــه
يــايــبه
يـايــبه

يـــايــبــه،،وينك؟؟انا مليت ليلي والتعاوي
من رحلت ومابقى بهالكون من احسب حسابه

يــايــبــه،،من غيبتك زادت جروح بلا مداوي
ثم جرحني الوقت فالطفل اليتيم وباغترابه

غبت غيبه دون رجعه// آآآه يالعن المناوي!!
كلما تمنيت قلبك زادني الوقت بعذابه

وش يبي فيه المرض خلاه قدم العين ذاوي؟
وش يبي فيه الزمن ماعاد بجروحه طبابه؟

كلما هبت هبوب اشم ريحه عود جاوي
وكلما شميت ريحه فز قلبي واحتفى به

وكلما مانظرت عينه ماذكرت الا النداوي
وكلما عانقت صوته ماذكرت الا الربابه

وكلما تدمع عيونه راحت عيوني شلاوي
وكلما ونت ظروفه ضاقت حدود الرحابه

ولويمل الوقت مامليت من كثر الدعاوي
ياعسى الله ،،ياعسى الله،،مايلحقني غيابه